قصيدة : دستور يا أسيادنا دستور

.............. شعر د/ هانى أبو الفتوح دَسْتورْ يَاأسْيَادنا دَسْتورْ
[ندعوك للتسجيل في المنتدى أو التعريف بنفسك لمعاينة هذه الصورة]

كل العالم من حوالينا
بيجري بيجرى وبيتحَوِلْ
وإحنا لسه بنسأل بعض
مين الأول ؟ مين الأول ؟
........................
آدى فريق واقف بيِصَرَخْ
وعامل فيها فاهم ويْتَرخْ
الانتخابات قبل الدستور
وإلا ساعتها هَنِطفي النور
ونشعللها ونولعها
ونمشي نهد بيوت وقصور
ونبقى أُسُودها وصوتنا هيعلى
وناكل بعض ونبقي نسور
..........................
وفريق تانى يقول .. انساني
الأول هو الدستور
وألا هنرجع تانى ونثور
إحنا طلبنا واضح جدا
لو يتأخر ما اتنفذش
هنخليلكوا الدم بحور
...........................
وفريق تالت وعْيَارُه فالِتْ
بيقول إسمع لازم الأول
كلنا نعرف مين رَيِسنا
ييجى يحكيلنا ويوَنِسنا
ويعرفنا كام يِدينا
ويفَرحنا بطقمين صوف
ويا الكَسْتُور
........................
دى قصتنا ودى حكايتنا
إللي بنحكيها بقالنا شهور
ونُص الشعب وتِلْتُه معاه
مايعرف غير إتفضل خُشْ
تعالي يا أخينا ..
يِرُد يقول ..
يا خْوانْ .. دَستور
كل مطالبه فى رغيف عيش
كل مُناه في الجيب مستور
.........................
[ندعوك للتسجيل في المنتدى أو التعريف بنفسك لمعاينة هذه الصورة]

إحنا الشعب الطيب جداً
إللي عمره ماعرف الصف
وإللي حياته ما فيها طابور
في الحرية بنمشي الخطوة
تاتا تاتا وطريق مكسور
وف الوطنية ضاربينها تلاته
ومش فاكرين منها ألا عبور
..........................
يبقي تعالي ياواد يا شحاته
نادي لشاويش ولْلا لمأمور
خليه يشرح لينا الأَولْ
ويِْقَصَرْ في كلامه ما يْطَوَلْ
أصل أنا سايب الشاي عالنار
والواد عوضين قام على حِيلُه
هناك مَنْطُورْ
البِتْ حميدة جالها الطلق
و لا فيش دَاية و لا دَكْتور
.........................
بس حميدة دي بنت أصول
ومن بيت عِزْ عليها النور
حاملة في شعب بالملايين
عاش في حياته كتير مقهور
و لا بيفكر غير في اللقمة
وغير في الزرعة
وشِوالين قمح ولْلا كماوي
ويا تقاوى و ويا بذور
وأكبر حِلمُهْ
يِرْكَبْ باص ولْلا الحنَطور
وإحنا قال جايين نِشرَحْلُه
ونِْفَهَمُه ونقول دُستور
وهو يِرُدْ يقول مَاني فاهم
دَستور يا أسيادنا دَستور
دَستور يا أسيادنا دَستور
دَستور يا أسيادنا دَستور

شعر : د هاني أبوالفتوح
الكويت - الإثنين 13 يونية 2011

سلمت اناملك د/ هانى

معاك كل الحق

الناس مش عارفين المفروض يكون أيه الاول

الدستور والا الانتخابات

و الا مراعاة الفقراء

تحياتى لك اخى الكريم

كلماتك دائما ما تعبر عن نبض الشعب المصرى

سلمت لنا لنعيش الحلم فى أشعارك الرائعة

تقبل تحياتى