انهارده احكيلكم حكايه
حكايه جميله
عن ولد وبنت
اطفال يعني
صغار في السن
كانوا جيران في زمن القرش
لعب الواد ويا البنت نط الحبل
دخل الواد ويا البنت
مدرسه حلوه
مصروف واحد على اتنين
كان الواد بيخاف على البنت
جابها معاه في نفس الفصل
عدت سنه وراها سنه
والواد ايده في ايد البنت
كل الحته عارفه ان
الواد ده هياخد البنت
كبر الواد -- شهامه ورجوله
وشنبه خلاص يعيني خط
اما البنت سبحان من صور
جمال وحلاوه
فوق الحد وفوق الوصف
دخل الواد ويا البنت كلية قمه
ذاد الحب في قلب الواد
اما البنت حياتها معاه
خلصوا جامعه
اشتغل الواد معيد في الجامعه
جاااااااات الخطوه
راح الواد لأبو البنت
طلب الواد ايد البنت
فرحه كبيره في عيون البنت
دخل الواد كان على أده
طلب الوالد مهر وشبكه
فوق الحد وفوق الوصف
قال الواد خطوه بخطوه
حبي وحبها يكفي العالم
قالت البنت انا عايزاه
هو حياتي وكل الدنيا
ومن غيره هو انا مسواش
رد الوالد لعب عيال
من غير قرشك انت متسوا
خرج الواد حزين مكسور
اما البنت يعيني عليها
حزن وهم واكل مفيش
راح الواد يقابل البنت
فوق الواد هم جبال
يعمل ايه في زمن القرش
قالت البنت انت العالم
يلا نروح لاقرب مأذون
ننسى الدنيا واللي عليها
ونرجع تاني صغار في السن
رفض الواد وقالها اهلك
كلام الناس مبيرحمش
ماهو اصله جدع وشهم كتير
قالت البنت
موج البحر ارحم ليا
بعدك عني يعني الموت
رد الواد ايدي في ايدك
نرجع تاني صغار في السن
بس المره ديه تحت الميه
نزلوا الميه
دابوا في البحر
شافهم واحد قاعد على الشط
نادى وقال
غريق في البحر
نزلوا بسرعه
سحبوا الواد ويا البنت
ايد الواد في ايد البنت
جسوا النبض
داسوا على الصدر
لسه النفس جوه الصدر
عرف الوالد باللي جرى
جرى على البنت
بنتي حبيبتي انا متاسف
بنتي حبيبتي دا الموت كفر
قالت البنت
انا وحبيبي كان نفسنا
نرجع تاني صغار في السن
عرف الوالد بكلام الواد
شهامه ورجوله واخلاق عاليه
قال الوالد انت اليوم في مقام الابن
ايدها في ايدك
وابنوا حياتكم
خطوه بخطوه
وارجعوا تاني صغار في السن
بس بشرط
صاح الواد ويا البنت
تاني شرط
قال الوالد
حفيدي حبيبي يكون على اسمي
وارجعوا تاااااااني صغار في السن
------------
تحياتي لكم
الملك المسامر
موضوع: ((( حكاية الواد ويا البنت ))) 
الأربعاء 4 يناير 2012 - 7:28
