المهم فيه رئيس !
مش مهم هيعمل إيه
مش مهم إيه فى راسه
وف عنيه
مش مهم فِكْرُه حتى
وللا خبرة تبان عليه
المهم يكون رئيس
.........................
مش مهم صاحبه مين
مش مهمه المبادىء
وللا أصحاب السنين
مش مهم مين صديقي
ومين عدوي ومين ومين
....................
مش مهم يكون معايا بلطجية
مش مهم يكونوا زفة كدابين
وللا حتى كام غَزِيَّة
ويا طبلة و رقاصين
وللا غِنوة للي قام عوج الطاجية
وإللي كان عامل ياسين
لما راح وباع بهية
بالتلاته رَمَى اليمين
.........................
مش مهم يخون جماعته
بعد عمر طويل معاه
المهم نفسه بس
دي العبادة والصلاة
.......................
مش مهم يكون خيال
كان يمين يقلب شمال
وللا فردة إستبن حتى وإحتمال
في البلد دي مش مهم
إيه يكون لعب العيال
.............................
مش مهم صوته عالي وللا واطي
مش مهم يكون مِطَاطِي
المهم يكون رئيس
يعرف يقول كلمة فلول
حتى لو كان إحتياطي
..........................
مش مهم يقولوا كافر وللا مُلحد
مش حرام لو سب دين
المهم يكون رئيس
حتى لو باس الإيدين
..........................
مش مهم
لما يشرب حتى ويسكي
أو مِبرشم أو يشم
مش مهم
أما ينفخ في سِيجَارُه
يقول يا حرب
وجوة أوضه يقول يا سلم
.........................
مش مهم عمره كام
أو تكون حاكماه مدام
مش مهم سيرته حتى
أو طريقته في الكلام
كل دا مش مهم
المهم يكون رئيس والسلام
هو دا بس المهم
هو دا آخر تمام
.....................
مش مهم خيال مآته
نكرة كان ....
وللا يمشي تاته تاته
إحنا بنحب الرضاعة
وإحنا بنموت في الشحاته
......................
كل دا مش مهم
المهم يكون رئيس
ييجي بالعسكر ...
ما ييجي
وللا ييجي بالبوليس
ييجي بس !!!
حتى لو بعد ما ييجي
الشعب كله يموت فطيس
......................
ركعتين لله يا ناس
كلنا نْسَبَّح خلاص
بيقولولك وافقوا مِية
وإجتماع ديموقراطيه
قسمونا
ويعصروا فوقنا لمونة
ومهما قلنا
طظ فينا وف حقوقنا
فكروا لنا
وإختاروا لنا
أصلنا كنا إتزنقنا
قمنا بالثورة و نهتف
يسقط الظالم وحكمه
بس في الثورة إتسرقنا
....................
كل ده مش مهم
العروسة بعد خيبة للعريس
مش مهم الشعب طظ
المهم فيه رئيس . فيه رئيس
فيه رئيس . فيه رئيس
شعر وألم د هاني ابوالفتوح
الكويت - الأحد 22 إبريل 2012
[center]
موضوع: قصيدة : المهم فيه رئيس 
الثلاثاء 22 مايو 2012 - 23:35
