في عيد الحب

في عيد الحب بكتبلك
قصيدة حب بتقولك
بَحِبِّكْ أيّوَه من قلبي
ومغرم بيك
بَحِبِّكْ كلمة بكتبها
وبقراها في نِنْ عنيك
بكلمة حب مكتوبه
بتشجيني
بَحِبِّكْ والشعور جامح
ودايب فيك
بَحِبِّكْ حب أد الكون
بَحِبِّكْ أيوه حب جنون
بَحِبِّكْ وإنتي حبيني
دي لمسة حب
بالْحِنّيَه تحييني
وكان نفسي أقولهالك
بإحساسي
بأنفاسي
على كتفي تنام راسك
وعلى كتفك تنام راسي
وأضمك بالحنان لِيَّا
ما بين القلب وإدَيَّا
تحسي بنبضي جواكي
وأحس بنبضتك فِيَّا
نغيب عن دُنْيِة الأحزان
عن الأطماع
عن الأوجاع
ندوب بحنان
وترجع بِينَّا حالة الحب
زي زمان
وأكون خِلِّكْ
وأشوفك في العيون بستان
وأقطف ورد من خدك
حمارو من حَمَارْ وَرْدِكْ
ومن قلبك
يبان فُلِّكْ
ونبقا أنا وإنتي شئ واحد
ما يعرفوا ضِلِّلي مِنْ ضِلِّكْ