جربت طرق كتير للكتابة وما نفعتش متخافش ... معاي أطلق العنان لأصابعك على اللوحة

السلام عليكم ورحمة الله وبركاته

دلوقتي وعلى عجالة من الأمر عايز ابدأ معاكم في شيء فيه قدر كبير من الجرأة منكم طبعا وهو أنك تطلق العنان لأصابعك فوق لوحة المفاتيح وهي النصيحة الي نصحني بيها زميل ليا في الشغل والكلام ده كان بعد سنة من الشغل ما بين كل الطرق في منها الصحيح وفي منها الخاطئ ولكن من زميلي ده استقيت المعلومة الصحيحة للبدأ في كتابة كل كلمة بثمانية أصابع من اليد للكتابة والاصبع التاسع الي هو الابهام في اليد اليسرى يستخدم في الضغط على المسطرة الي بتعطينا مسافة ما بين كل كلمة وكلمة.

عايز انبه على شيء سبق وأكدت عليه اكتر من مرة انه الانطلاق الصحيح والسليم لكتابة أي كلمة أو أي جملة كاملة يعتمد على تثبيت اليدين على أحرف الارتكاز الي شرحناهم في الدرس السابق ومن ثم العودة إليهم بطريقة لاإرادية وما تخافوش ده هيحصل مع الوقت يعني مش هتفضل دايما مركز على أنه ايديك ترجع لأحرف الارتكاز إلا لفترة وجيزة لا تتجاوز العشر أيام

تكمن أهمية احرف الارتكاز في أنها قاعدة ثابتة لوضع اليدين والسنتر او المركز الرئيسي الي بيخلينا نعرف باقي الاحرف يعني كأنك واقف في الاوضة بتاعتك وخلاص اتعودت على كل حاجة فيها وعارف مكان السرير فين والدولاب والكرسي الفلاني والكومدينو وكده يعني

بمجرد وقوفك في وسط الغرفة هتعرف فين السرير وفين الدولاب وفين الكرسي ولو حصل وحد غمض عينيك هتعرف من منطقة الارتكاز اماكن الحاجات دي فين بالتحديد ولو حصل خطأ هيكون بنسبة 1% او اكتر على الأقل

وعايز اقول معلومة مهمة يا اخواني وهو انه:
في مجال الطباعة في ثلاث أشياء أمامك – لوحة المفاتيح – الشاشة – الورقة الي بتكتب منها... وعلشان تتعلم سرعة الكتابة انت محتاج تستغنى عن واحدة من دول على الأقل.
اعتقد مش هينفع نستغنى عن الورقة الي بننقل منها .. والشاشة محتاجينها علشان المراجعة على كل فقرة بنكتبها مش كل كلمة طبعا.. إذن احنا محتاجين نستغنى عن لوحة المفاتيح مع الوقت.
علشان كده انا بحاول على أد ما أقدر ابين واوضح أهمية احرف الارتكاز واهمية العودة باصابع اليد ليها بعد كتابة كل كلمة بنكتبها وصدقوني وبصدق بعد مرور عشر ايام من التدريب لمدة ساعة على الأقل هتلاقوا اختلاف جذري في طريقة كتابتكم المعهودة وانا متكفل بده انشاء الله ومش عايز غير الدعاء لوالديا بالرحمة ولأمة المسلمين انشاء الله

وياريت حد يفكرني ارفعلكم برنامج من برامج تعليم السرعة الي عندي علشان تحملوه عندكم وتطبقوا تطبيق صحيح انشاء الله وانا عارف انه هيساعدكم انشاء الله في زيادة السرعة.
يرجع مرجوعنا للكتابة بتاعتنا
دلوقتي عايزك تكتب الكلمات دي عشر مرات وعادي بص على اللوحة بتاعة المفاتيح بس من غير تغيير أماكن الأصابع على احرف الارتكاز يعني زي ما قلنا كل صباع ليه مهمة يأديها ويرجع للمركز بتاعه

كمنت بيسش كمنت بيسش كمنت بيسش

طبعا دول احرف الارتكاز علشان تعرف تبدأ بيهم انشاء الله

هتقولي يا عم انا زهقت من أحرف الارتكاز هقلك انا بوعدك لو اتعلمت تستخدمهم بالشكل الصحيح زي الشرح ما بيقول وعرفت تكتب الكلام وترجع ليهم تاني وقدرت تبدأ بيها في كتابة أي كلمة ومن ثم ترجع ليها هقولك انت تعلمت 50% من سرعة الطباعة وبدون أي مبالغة .

بعد ما تطبق ده عشر مرات على الأقل ولو عايز تزود يبقى خير انشاء الله عايزك ترتاح شوية كده وتشرب ينسون وابعد عن الشاي والقهوة وبلاش تعملي فيها هكر وبلاش تدخن وتشيل نفسك هم كبير ده طبعا بالنسبة للرجال
وبالنسبة للنساء بلاش العصبية ولا الملل

وفي النهاية اقدم لكم بعض النصائح الواجب اتباعها أثناء التدريب حتى نحصل على التقدم المطلوب انشاء الله.

1. اجلس أولا في وضع معتدل أمام شاشة الكمبيوتر ولا تنحني على لوحة المفاتيح.
2. انظر للورقة التي تنقل منها وركز تركيز شديد على الكلمة وانا متاكد انه مدى حفظك لاماكن الاحرف هيتجلى في اللحظة دي انشاء الله، ولا تلتفت للوحة المفاتيح إلا في حالة كتابة رمز معين أو ما شابه. وده طبعا مش محتاجينه دلوقتي الي هو كتابة رمز او تنوين لاني هشرحه في درس تاني وهو استعمال زرار الشفت في كتابة الهمزات والاقواس والرموز والتنوين
3. لا تتعجل أثناء الكتابة فتخطئ ولكن ركز أن تكتب بسرعة مناسبة وبأقل أخطاء ممكنة.
4. لا تمد أصابعك على لوحة المفاتيح، واجعلها مثنية منحنية على لوحة المفاتيح.
5. لا تجعل أصابعك منقضة على صف الإرتكاز فيصعب عليك الإنتقال للحروف الأخرى، بل اجعلها بعيدة شيئا ما، لتكون حركات أصابعك خفيفة. وده مهم يا جماعة
6. اضغط على الحروف بسلاسة و مرونة ولا تضغط بشدة فتكرر الحرف عدة مرات فتضطر للمسح و التوقف عن الكتابة.
7. احرص على ممارسة الطباعة من وقت لآخر، فقد تقل سرعتك لقلة الممارسة وقد تنسى أصابعك مواضعها على لوحة المفاتيح بعد فترة.


وفي الدرس القادم انشاء الله هكتب طريقة التحريك الصحيحة والسريعة لكتابة بعض الكلمات الجديدة والتطبيق السريع على ده
وهنعرف بالتحديد ازاي انه لوحة المفاتيح شبه اوضة النوم وازاي نحفظ جميع الاحرف عن ظهر قلب انشاء الله وبسرعة كمان


اخوكم المتخصص