"تعظيم سلام".. قصيدة للشاعر أشرف الشافعى

[ندعوك للتسجيل في المنتدى أو التعريف بنفسك لمعاينة هذه الصورة]

للشاعر أشرف الشافعى

( 1 )
تعظيم سلام لمصر ست الكون
أرواحنا عاشقة ترابها فين ما نكون
كامل كياننا بعشقها مسكون
وهى مهد العشق والعشاق
( 2 )
تعظيم سلام لكل بيت فيكى
ولكل حضن حنون مدفيكى
ياما قلت من أحاسيسى ح أنفيكى
لكنى بارجع احنّلك واشتاق
( 3 )
تعظيم سلام للجيرة والعشرة
دهب وماس برلنت مش قشرة
وشوش بريئة لا خاينة ولا كِشرة
قرب وخدلك درس ف الأخلاق
( 4 )
تعظيم سلام للى حما عيلتى
وف غيبتى عن وطنى سند ميلتى
وانا بره مصر لقيته ُضللتى
وعيالى وعياله ف حضنه سواء
( 5 )
تعظيم سلام لقلوب بشر صادقة
قالوا نموت وتعيش ماهش فارقة
لكن حنحمى بكره م السرقة
ومافيش فروق لا ف دين ولا أسماء
( 6 )
تعظيم سلام لكنيسة مع جامـع
ولكل حارة وناصية مع شارع
هما اللى جابوا فجرك الطالــع
توأم ف لون الدم والأشلاء
( 7 )
تعظيم سلام يا أمى يا بهيـة
تلاتين سنة بيجربوا فيا

واما طالبت بعيش وحرية
عايزينى أرجع عتمة الأنفاق
( 8 )
تعظيم سلام لحفيد وأب وجـد
ماخافش لكن قام وخدها بجد
مين اللى قال الثورة ملك لحـد
غير الكرامة مافيش أمل ورجاء
( 9 )
تعظيم سلام يا بنت مصرية
قلتى لحبيبك مهرى حرية
سندى وأمانى ف دنيتى الجاية
علشان ولادنا يشوفوا خير ورخاء
( 10 )
تعظيم سلام لكيبورد مع شاشـة
فضحت نوايا خاينة غشاشة
وقلوب مريضة حاسة بهشاشة
سارقة عرقنا وهى أصل الداء
( 11 )
تعظيم سلام لبنات مع ُصبيان
من غير رصاص ولا آلى ولاعُصيان
طلعوا المظاهرة يرفضوا الطغيان
ويقولوا للظلم الطويل إلغاء
( 12 )
تعظيم سلام لحشود بتزرع ضى
طلعت تقابل فجر بكره الجى
وماهمهاش ضرب الرصاص الحى
مارد غضب حطم قيوده وفاق
( 13 )
تعظيم سلام لشباب جمعها مصير
زوّق هتافها ميت ميدان تحرير
هانت خلاص وماعدش باقى كتير
بقى صعب تانى نتحكم بغباء
( 14 )
تعظيم سلام يا مصر يا معاندة
مالناش ميول سياسية وأجندة
ولا لينا شوق نعمل بروباجاندة
وماتسمحيش لعبده بيه مشـتاق
( 15 )
تعظيم لـُحر ماعامش مع موجة
ماسرقش حلم ف معمعة وهوجة
ولا قال كلامه بنية معووجة
علشان يبان ف نشرة الأنباء
( 16 )
تعظيم سلام للى رفع راسنا
علشان ف وقت الشدة يحرسنا
ولا ميت نظام تانى حيخرسنا
بدراعنا نحميها مـن الغوغاء
( 17 )
تعظيم سلام يالجان ياشعبية
قولى للجبان اللى خلا بيا
مااحناش عيال هايفة وسلبية
مصر الحضارة تصد أى بلاء
( 17 )
تعظيم سلام للى وقف راجل
بعد اما جاله بيان هروب عاجل
قال لو كرامتى حابيعها بالآجل
إيه فايدة إنى أكون من الأحيـاء
( 18 )
حرس سلاح لمحمد البطران
اللى أهان الخسة والخسران
نوّر بدمه شمعة الأوطان
ولاهّمه أمر هروب ولا إعياء
( 19 )
تعظيم سلام للى نجد فجرى
وألف حسرة ع اللى قام يجرى
وسابها للسافل وللغجَرى
علشان يخرب كافة الأنحاء
( 20 )
تعظيم سلام ياعسكرى ف جيشى
يابنى وأخويا وصاحبى وشاويشى
وآكل معايا ف ملحى وف عيشى
وحامينى ف الشارع و ف الـُقشلاق
( 21 )
تعظيم سلام يا أبو الشهيد يا عنيد
شيلته بإيديك ف زفة الزغاريد
قدمت ابنك للشهادة سعيد
ولسة باقى اتنين لمصر فِـداء
( 22 )
تعظيم سلام يا كل روح طاهرة
خرجت عشان تفدينا ف مظاهرة
قدرت تفك الكرب والقهرة
مبروك عليكو ياخيرة الشهداء
( 23 )
تعظيم سلام يا سويس يا ولاّدة
ياللى الأصالة فى معدنك عادة
واخدة الجهاد فريضة وعبادة
طول عمر شعبك للميدان سباق

( 24 )
تعظيم سلام ياماريـّا ضميهم
أملك حيتحقق على إيديهم
أيووه عليكى وانتى وسطيهم
دينك خلاص بيسددوه بوفاء
( 25 )
تعظيم سلام يا مصر يا أصيلة
لمى عيالك واجمعى العيلة
كشفوا الولاد المكر والحيلة
كفاية عشنا سنين ف زيف ونفاق
( 26 )
تعظيم سلام يا ساحة التحرير
أسفلت أرضك كان دفا وحرير
ومهما تانى رجعت أنام ف سرير
مش حانسى واحد مرة بات ف خلاء.
................
تعظيم سلام يا مصر
تعظيم سلام

• شاعر مصرى يعيش فى جدة

تعظيم سلام يا مصر يا أصيلة
لمى عيالك واجمعى العيلة
كشفوا الولاد المكر والحيلة
كفاية عشنا سنين ف زيف ونفاق

الله عليكى يا مصر
دايما بتمدينا بشعراء وأدباء
علماء وفلاسفه واقتصادين
كلهم قالوا
احنا هنا موجودين
ورا ثوره شبابيه قامو بيها الابطال
يالا ايدنا نتشابك نرجع الامجـــاد

تحيـــــــــــــا مصـــــــــــر

ان شاء الله مصر هتفضل أحسن بلد فى الدينا كلها

تحيا مصر يا عم

[ندعوك للتسجيل في المنتدى أو التعريف بنفسك لمعاينة هذه الصورة]

» قصيدة جحا للشاعر هشام الجخ جاااااااااااااااامدة
» قصيدة للشاعر...{حمار آل حمآرين آلحماري}
» قصيدة العمة يامنة ـ للشاعر عبد الرحمن الابنودي
» قصيدة يا مصرنا.. للشاعر الفلسطينى سامح كعوش
» قصيدة ثورة وعدت على خير للشاعر د هاني أبوالفتوح