قصيدة : مين فينا الغلطان ؟

مين فينا الغلطان ؟ ......... شعر : د هاني ابوالفتوح

[ندعوك للتسجيل في المنتدى أو التعريف بنفسك لمعاينة هذه الصورة]

انت الغلطان وللا احنا ؟
إسأل نفسك وقت المحنة
مين بهدلنا و مين يعايرنا
و مين جرحنا ؟
مين خلانا نشحت قوتنا
ونبيع روحنا ؟
مين يوعدنا يصلح بكره ؟
وبكره بييجى وهو دابحنا
مين خلانا نحلم برغيف
هربان ولا راضي يصالحنا ؟
مين عاش يحكم فينا سنين
هَمُهْ مصالحه , ونسي مصالحنا ؟
.......................................
فاكر لما مسكت الحكم
قلنا نشيلك جوه عنيننا
كام سنة عدت
كل الدنيا ما تسمع بيننا ؟
لا فْيُوم نشكي .. ولا يوم نبكي
ولا فكرنا نمد ايدينا
قلنا هنصبر هنا وياك
والصبر في آخره هيدينا
نبني بلدنا .. وتِعْلَىَ رايتنا
والدنيا ساعتها ما تكفينا
ريسنا بطلنا وبنحبه
دا كفاية ..
كان ف اكتوبر وعبر بينا
...............................
عَدِتْ كام سنة متغيرناش
وانت إللي بديت وبتتغير
تقول اصبروا.. بكره هتفرحوا
أحنا بنصبر .. و انت ما تصبر
كبروا ولادك وبدأنا نشوف
هَمْنا يكبر
هما يعبوا و يدوا أصحابهم
و انت لا تِدِي .. ولا بتقدر
وتقول دا زيادة سكان
مكتوب كاتبه الله ومقدر
طيب القدر كان بس علينا
وللا انت علينا بتتشطر ؟
ونْقَلِبْ دفاترنا نلاقي
كله معاك .. إما حرامي
أو شيخ منصر
واللي يعارضك
يفضل في السجن بكام محضر
قلنا الله دا مفيش رحمة
قلبه اِتْحَجر
هنا قلنا كفاية وبزيادة
وبدأنا نفكر ونعبر
و لو قلنا اِرْحَمْ
بتقول لأ ... بعنيكم
قاعد علي قلبكوا مِتْمَسْمَر
ومن بعدي ييجي المحروس
ابني الشاطر المتشطر
سنة سودة .. هو انت كمان هتْوَرثنا
لواد مجنون عفريته جايلي ومِتْحَضر
صرخنا وقلنا لأ .. دا لا يمكن
علي جثتنا .. يا إما نموت أو نتطهر
وترد تقول .. كلمتي تمشي
أنا بس .. كبير
و احنا نقولك .. ربنا أكبر
يا ريتك سبتنا من بدري
العمر كان لسه صغير
مش كان بزيادة عليك و علينا
وألا انت .. فينا ما بتفكر
.......................................

[ندعوك للتسجيل في المنتدى أو التعريف بنفسك لمعاينة هذه الصورة]

مين وصلنا لآخر المشوار
يا نقول سراق وألا حرامي
يا نقول قَتَال .. ناخد بالتار ؟
من عيشنا ف الوهم كتير
مين صحانا وبقينا أحرار ؟
مين إتغير فينا وأَسْى قلوبنا
خلا قلوبنا زي الأحجار ؟
مين عَلا ما بيننا وبينك
وبدال ما هنبنيها محبة
قمنا بنينا بدلها جدار ؟
أهي مصر في لحظة بقت ولعة
و انت اللي بتتكوى بالنار
..................................
مين خللي الحكم فساد
مين اتكبر فيها وساد ؟
مين دايماً ما بيسمعش
ومَلا الدنيا بحالها عناد ؟
مين كان بيطنش ويكبر
ناسي إن لِعُمْرُه ميعاد ؟
ونسيتني ونسيت أيامي
لا تقُولِي محبة
ولا عاد صبر ولا فيها وداد
ومشيت ع الأرض .. ما همك حد
والحاشية .. عملوني مزاد
يا خسارة الأيام الحلوة
يا خسارة حرب الأمجاد
وعشان لا أفكر و أتعكر
ولا حد يقُولِي كلام بطال
فكرت لقيت العيب كان فيك
إنت إللي قسيت .. وإنت اللي بديت
وإنت إللي بقيت للدنيا مثال
فاكر .. طول عمري أنا طيب وابن حلال
ولا بيع صاحبي بكنوز الدنيا ولا بالمال
ولا أحب الغدر .. ولا أحب الهجر
ولا فيا خيانة .. ولا محتال
أنا مصري .. أنا مصري أصيل
أنا حلمي قليل علي أد الحال
وأحب أبويا وأحب العم وأحب الخال
وبوقر كل كبير في السن
وأتمنى أجاوبه في أي سؤال
إنما وياك .. مش عارف ليه
قلبي المليان .. اتعبي وشال
أنا بايعك ... لا تعاتب نفسك ولا أعاتبك
سايبك ... ربك وحده اللي يحاسبك
سبحانه الوهاب المتعال

شعر : د هاني ابوالفتوح
الكويت – السبت 16 إبريل 2011

احنا الاتنين غلطانين

ويمكن غلطنا احنا اكبر السلبيه والخوف اساس الغلط كله

تسلم ايدك د هاني

قصيده جميله جدا جدا

تقبل مشاركتي

معاكى حق و الله يا ام مالك

قالوا لفرعون مين فرعنك

تسلم دكتور هانى

كلمات فى غايه الروعة

دائما شعرك يتحدث عما يدور بداخلنا

و عذرنا عن تاخرى

لانى كنت مشغول

لكن لا أتاخرت عنك الا بظروف

شكرا لك و تقبل تحياتى

ام مالك كتب:: احنا الاتنين غلطانين

ويمكن غلطنا احنا اكبر السلبيه والخوف اساس الغلط كله

تسلم ايدك د هاني

قصيده جميله جدا جدا

تقبل مشاركتي

أختي الفاضلة أم مالك السلام عليكم ورحمة الله وجمعة مباركة بإذن الله تعالى نعم كل من سكت عن ظلم أو قهر وتراخى مخطأ لاجدال ولا شك ولقد ذكرت ذلك في قصيدة منفصلة تفصيلا بإسم إعتراف لنعترف بأخطائنا أولا ولا أدري إن كانت قد حظيت بقراءتكم أم لا , ولكني هنا أردت أن أنهي حالة من التساؤل تدور فى نفس البعض وكثير من عامة هذا الشعب الطيب لأحكي من خلالها قصة 30 عاما كاملة , أشكر لك تواجدك هنا ولكم خالص التحية والتقدير

رياض العربى كتب:: معاكى حق و الله يا ام مالك

قالوا لفرعون مين فرعنك

تسلم دكتور هانى

كلمات فى غايه الروعة

دائما شعرك يتحدث عما يدور بداخلنا

و عذرنا عن تاخرى

لانى كنت مشغول

لكن لا أتاخرت عنك الا بظروف

شكرا لك و تقبل تحياتى

الأخ الحبيب الأستاذ رياض العربي
بارك الله فيك وحفظك لنا وجمعة طيبة مباركة من الله تعالى
أعلم والله كم إنشغالك خاصة هذه الأيام من السنة والإمتحانات وعبء المنتدى كاملا وأدعو لكم بالتوفيق والسداد وهناك قصائد كبيرة لم أنشرها بعد منها الأماني الحائرة وأوراق وطن مبعثرة لم أشأ وضعها حاليا إلا بعد إستئذانكم لأنها بدون لمستكم الكريمة لن ترق لي شخصيا فتقبل خالص مودتي وتقديري وإحترامي وصادق دعائي
المحب دائما
هاني ابوالفتوح

» قصيدة عمر قطامش هدىء أعضاءك يا فلو - قصيدة عمروقطامش للمجلس العسكري والفلول
» قصيدة أعجبتني جدًّا في مدح الرسول صلَّى الله عليه وسلم, قصيدة رائعة
» مين فينا المصدوم
» فينا .. مدينة تعرف معنى الاحتفال
» نعيب زماننا والعيب فينا وما لزماننا عيب سوانا