قصيدة : من جمعة لجمعة

مِنْ جُمْعَة لِجُمْعَةٌ !!!
النهاردة الجمعة ..
جمعة سعيدة ..
أيوة سعيدة علينا وعليكو
لحظة شوية آخُدْ تنهيدة
الله يخليكو
لحظة أتوضى في بدلة جديدة
وآجي أَصَلِي
إِيدي في إِيدِيكو
بس حقيقي
زهقان أوي م إللي بْيِحْصَلِّي
زهقان من نفسي
ومن عَمَايِلكُو ومن بَلاوِيكُو
.......................
بَقيتْ مش فاضي لا بَرُوحْ شُغْلْ
ولا أعمل حاجة
قاعد كده مِتْوَنِّسْ بِيكو
وأنا هَفْضَى إزاي
دا أنا وياكو من جمعة لجمعة
مع لمَة كبيرة وناس حَوالِيكُو
بَقَتْ الجمعة يدوب عَلشانْكُو
وعلى ملايينكُو
وأنا اللي بنادي إكتبوا أساميكُو
....................
كفاية عليكو
من جمعة لجمعة
ييجي الواد جمُعَة يِنَضَّفْهَالكُو
تِحْلَا السهرة والأرضْ الطَاهرة
بِتِفْرَحْ بيكو
أصْلِها واسعة .. وساحة كبيرة
وميدان أخضر .. مع شرب البيرة
بِيْفَكَرْكُوا بِهَنَا لَيالِيكُو
بس الحَرْ إللى مْعَكَرْها و مْغَيرها
ومْزَوِدهَا شوية مْعَاكُو
علشان كده هَوْصَلْ لِلعَتَبَةْ
وهَجِيب مَصْرِي نِرُشْ المَيَّة
وأهو نْلَيِّفْكُوا ونْحَمِّيكُو
بس بلاش
من جمعة لجمعة الله يخليكو
...........................
بس حقيقي بجد بجد
جمعة جميلة
أما حقيقي أنا شُفْتْ حاجات
نفسي أحكيها وأعمل هُلِّيلَه
الحاج حسين جُوة الخيمة
صاحي و مْفَنْجِلْ
والواد يجري ياخد تَعْسِيلَة
و مُخْلِصْ ثَورِي و مُشْتَاقْ حُر
طلبوا بِلِيلَةْ
والواد بِلْيَة مع الواد بِشْلَة
ماسكين سكينة للواد بُقْلِيلَة
والواد مَشْرَطْ واقف يِشْرُطْ
ويكتب طلبات ومطالبُه قَليلة
رفضها مغاوري و وقف قال
طلبات إيه إللي بتكتبها
إسكتْ بلا نِيلَةْ
والواد فوزي بياكل كُشَرِي
و طَلَبْ شِيشَة
رد حسين أَصلُه مُثقفْ
قاله يا جاهل إسمها نرجيلة
وأما تشوفوا تقول أستاذ
و الخط يِفُكُه يَدُوب بالتيلة
هو أساساً جِهْ ويانا عشان يتفرج
وأنا شَرْحُه .. جَايْ وِ بَهَرَّجْ
جاي مع ثوري يدوب بِجْمِيلَةْ
وأخوه شعبان
قال م الليلة ياشيخ رمضان
دي آخر جمعة ليا معاهم
إنت لوحدك شِيلْ الليلة
وإللي ما جَاشْ على سوق الجمعة
فاتوا كتير كان جِهْ وإتفرج
وجاب العيلة
.........................
كنا كمان هَنْبَان أكتر
وقت الصورة كلنا واقفين
علشان مصر تبِانْ في المنظر
و نقول ثورة بقالها شهور
و تْعِيشْ لِسنين
الله يعيننا في عَدْادْ مصر
وثورة ثورة حتى النصر
العشرات بنقول مِيَاتْ
والميات بنقول أُلوفات
والأُلوفات بنقول ملايين
لما تعبنا أَوي في العَدْ
و مين هَيْعِدْ و مين ورا مين
.......................
يا تري قولولي هنعمل إيه
الجمعة الجاية والناس صايمين
نِجِيبْ فَوانيسْ ونْعَلَّقْ زينة
ونقول خِيمة رمضان فَتحتْ
و وَحَوِي يا وَحَوِي يا ثوريين
ونجيب ألعاب ونجيب حَاوِي
ونجيب مقرىء للتراويح
وتيجي عيال لابسين جلاليب
وِسْطْ بنات لابسين فساتين
وتبقى مناسبة نحيي الثورة
ونحيي الدين
.........................
الواد شوقي يُقَفْ مع مرعي
لحد الفجر ويستناك
وأنا برضو هَنَادِي
إللي يحب يقرا الكَفْ يجري هناك
وإللي هيكدب ياخد كَفْ ويبقى ملاك
والكداب بيروح النار ونهايته هلاك
وساعات تانية نقلبها مسابقة
ونعمل فوازير
والكل هيجري على التحرير
وجايز حتى يجيلنا وزير
ياخد صورة هنا وياك
والشهر يِعَدي نِكْسَبْ كام قرش
تصرفه بالراحة
على مزاجك وعلى هواك
وتحيا الجمعة ومن جمعة لجمعة
يا خُويا يا ثوري أنا في قَفَاكْ
...................
بس خسارة .. تعيشي يا مصر
ومستقبل مصر واقف مَكسُوفْ وبيترجاك
خِفْ شِوَية علشان مصر
وتِبقى الجمعة يوم في الشهر
بدال ما الحال بقى خير في ميدان
وباقي الشعب كله فَداكْ
لا لاقي اللُقمة ولا لاقي شُغْلْ
ولا لاقي حاجة ياكُلهَا هناك
كان الله في العون يابلادنا
قلنا خلاص قربنا نِخِفْ و تاخدي دَواك
بس الجمعة ومن وقفة لوقفة تِعِبِتْ مصر
وطالبة الرحمة ومفيش ناس هنا رَاحماكْ
ومهما تنادي وبصوت عالي
مش هتلاقي ناس سامعاك
خلاص يا بلادي
رَبِكْ عَالِم .. ربك وَحْدُه بس معاك
شعر د هاني ابوالفتوح
الكويت _ الجمعة 28 شعبان - 29 يوليو 2011

» ننشر خريطة خطب جمعة الغضب الثانية - الاحتفال بثورة يناير - جمعة الغضب
» جمعة مباركة الله يجعلها عليكم جمعة مباركة ان شاء الله
» قصيدة عمر قطامش هدىء أعضاءك يا فلو - قصيدة عمروقطامش للمجلس العسكري والفلول
» قصيدة أعجبتني جدًّا في مدح الرسول صلَّى الله عليه وسلم, قصيدة رائعة
» "جمعة".. يخطف فوزًا صعبًا للأهلى من الاتحاد