قصيدة : مولد سيدي التحرير

مُولِدْ سِيدِي التَحْريرْ
إبن النيل العاشق يِحْلَم
الحِلم دا حَقُه
وحَقُه يِحلم بالتغيير
نام واتْغَطى شاف الحِلم
قال الحِلم عاوز تفسير
سأله مُفَسِرْ إحكي الحِلم
إحكي يجوز حِلمَكْ أساطير
قال أنا شُفتْ الحِلم دا ثورة
ثورة حقيقي و رُووس بتطير
..................
بتقول ثورة .. ثورة لا يمكن
فكرك ثورة دِي تِنْفَعْ حِلم ؟
الأحلام عمرها ما تْغَيْر
والأحلام مالهاش تأثير
بس الحِلم دا لو يِتْحقق
صاحب الحلم دا عنده ضمير
قلت له إحكي فين الحلم
قال شُفْتْ الحِلم في ميدان تحرير
وشَعْبْ بيجري وشَايل الحِلم
وشَعْبْ يقول أنا حِلمي مصير
.....................
كلنا قلنا نعيش الحِلم
وبَدَأْ الحِلم ..
بس الظاهر الحِلم كبير
حِلْمِنا كان في شُعاع حُرية
وحِلمنا كان حمَلة تطهير
حِلمِنا كان ثورة وتضحية
عُمر الحلم ما كان تدمير
حِلمِنا كان فجرنا بيشَقْشَقْ
وإيد في الإيد نِبتِدي تَعمير
.........................
بعد الحِلم ما عَدا عَلينا
وقلنا يِعِيش زمن الأحلام
هِرِبْ الحِلم من حوالينا
أتاري الحِلم كلام في كلام
يبقي ياريتنا ما كنا بنحلم
وللا ياريتنا ما شُفْنَا مَنَامْ
كنت أتمنى الحلم دا يكمل
وكنت أتمنى نعيش في سلام
التغيير له أساس م الأول
والتغيير دا لازم له عَلَامْ
.....................
أول سَطْرْ في حِلم الثورة
كنت أتعلم قيمة الحكمة
وقيمة الصبر مع الأيام
يبقي العيب في الحلم دا نفسه
وللا العيب في مكان الحلم ؟
وللا العيب بقى في الأحلام ؟
.......................
قلت أرُوُحْ لمكان الحِلم
وأشوف دلوقتي وَصَلْنا لِفين
شُفتْ مِيدانْ أخضر ومْدَورْ
و بَشَرْ واقفة تِسِدْ العين
وشُفتْ حاجات محتاجة تِتْصَور
كأِني في مُولِد لِلسَيِدَة وللا لِحُسينْ
قُلْتْ الله يا حَلاوِةْ المولِدْ
بَسْ المولِدْ عُمْرُه يومين
وِمُولِد الثورة بَقَالُه شُهورْ
لا عَاوزْ يِهْدَى ولا يِرتاحْ
ولا رَيْحْنَا
ولا قال لنا هياخُدْنَا لِفينْ
وكأننا واقفينْ في البحر
ووسط البحر الكُل بيغْرَقْ
وبحر الثورة مالُوش شطين
يبقي العيب في مكان الحلم
وللا العيب بقى في المُولِدْ
جايزة كبيرة لِلي هَيعرف
ييجي يقولي العيب فين ؟ العيب فين ؟
.........................
ياللي صحيح كان حِلمَكُ ثورة
يالا معايا وحَذُرْ فَذْرْ
أحسن واحد هيشوف بُكْرَة
إللي في وسط النار بِيفَكَرْ
عُمْركُوا شُفْتوا في وِسْط المُولِد
حَدْ بِيِبْنِي وللا يِعَمرْ
وللا المُولد بس يِقَلِدْ
وإللي بيضحك وإللي يِمَثلْ
وإللي يِهَرجْ وإللي يِهَزرْ
وإللي بيمشي في وِسْط المُولِدْ
يا ما بيشوف و ياما بِيْدَورْ
حتى كمان في وِسْط المُولِدْ
بَسْمَعْ خُطْبَة لصلاة جمُعة
و يَالا نِصَلي .. اللهُ أكبرْ
وإللي ما صَلى صلاة الجمعة في التحرير
مُمكِنْ وَادْ لُهْ في العَفَاريتْ وَاقِفْ بِيْحَضَرْ
ووِسْط المُولِد عُمري ما هَعْرَفْ
مِين شِيخْ جَامِعْ و مِين شِيخ مَنْصَرْ ؟
وربنا شايف إن دا كُلُه كَلام في كَلام
ومفيش فَايدَة .. يِبقى كِفاية
آخُدْ كام صُورة و آخُدْ كام مَنْظَر
قبل المُولِدْ ما هَيِنْفَضْ وقبل الحِلْمْ ما هَيِتْبَحْتَرْ
بقي معقولة دا كان حلمنا ؟
بس في مُولِدْ وللا في خُطْبَةْ
وأعمل شاطر ولَلا أتْشَطرْ
مصر يا ناس حلمها حُرية وحِلمها عَدْلْ
حِلم يعيش .. يُوم ورا يُوم الحِلمْ هَيِكْبَرْ
عُمْرْ الحلم ما كان في المولد ولا في ميدان
وَاقِفْ الكُلْ هِنَاك مِتْمَسْمَرْ
قال مُشْ مَاشي وقال دي مَطالبي
وقال طَلباتي لازم تِتْحَقق
وعقلي خلاص صَوانْ مِتْحَجَرْ
والطلبات محتاجة لوقت عشان تِتْنفذ
وللا لازم دلوقتي وحالاً .. لا يُمْكِنْ هَصْبُر
كُل كلامي كُنْ فَيكون .. حَاشا لله
رب الكُون وحده إللي يِقرر
ربك قَدَرُه هَيمشي علينا
وكل دا شيء مَكتوب و مْقَدَرْ
.....................
وأنا إحساسي الخير جَايْ علشان مصر
بس حقيقي من جُوانا لازم نتغير
التغيير مش بس في ثورة وتغيير حُكْمْ
وللا قيادة وللا حكومة وللا في مجلس وبْنِتْطَهَرْ
التغيير لازم في نفوسنا .. لازم في طِباعنْا
لازم في عاداتنا وفي تفكيرنا لازم في الجَوهَرْ
التغيير في ثقافة شعب دَاقْ الظلم
وأما يِشُوفْ حرية حقيقي وثار وإتحرر
فعلاً لازم من جُواه يِبْدَأ يِتْحرك يِبدأ يِفهم
يِبدأ يِعرف قيمة الوقت إمتى يِعارضْ ولَلا يِعَبرْ
لكن وقت الشُغل شُغْلْ وفي الإنتاجْ لازم إنتاجْ
و مَصْرِنا شَافِتْ هَمْ كِبيرْ ومن حقها إنها تِتْعَمرْ
وإللي يِفَكَرْ في التطوير وللا بيحلم بالتغييرْ
وإللي الحِلمْ بتاعه كبير .. لازم من جُواه يِتْطَوَرْ
ومش معقول كل شوية نِفْضَلْ نِجري عالتحرير
ونقول دِي حُرية رَأيْ ونقول مطالبنا أو نِتْهَورْ
وكل يوم طالعين ببيان وإيه إللي هنبدأ بيه الأول
الإنتخابات وللا الدستور وللا رئاسة و بنِتْمَنْظَرْ
وأفْضَلْ أقُول دم الشهدا وسَقْفْ رواتب وللا فُلُولْ
ثورة مضادة وبُطء مَحاكم يالا بِسُرعة نِعمِلْ مَحْضَرْ
كأن الوقت بقى حِجتْنا و بَقى سِكِينَة بِتِدبَحْ فينا
و مصر حبيبتي زَي سَفينة بِنِخْرَق فيها ولا بِنفَكَرْ
قلت نصيحتي وقلت كلامي وسِبْتْ المُولِد
وجريت جَرْيْ رُحْتْ الجامع .. دَمي إِتْعَكَرْ
...............................
مِسِكْتْ المُصْحَف وبدأت أقرا في سورة يُوسِفْ
بِسم الله وآية في آية لِحَدْ الآية تِسعَة و تِسعينْ
ولَقيتْ نَفْسِي بِتِهْدا بِتِهْدا
بعد ما كُنْتْ لِوحْدى حَزينْ
قُلتْ دِي مصر كَرَمها المَولَى
في القرآن قالها صريحة للعالمين
يبقى إزاي هنخاف أونقلق ؟
أونستعجل وللا هنضغط بالملايين ؟
مصر محفوظة بحفظ الله
مهما نِعاني الحمدُ الله
كَتَبْ المولي عليها الأمنْ لِيُومْ الدِينْ
سمَوا مِعايا بسم الله .. رب العرشْ
وإدخلوا مصر بإذن الله دايما آمنينْ
إدخلوا مصر بإذن الله دايما آمنينْ
شعر : د هاني أبوالفتوح
الكويت – الجمعة 8 يوليو 2011

» قصيدة عبد الرحمن الأبنودى لثوار التحرير "الميدان"
» صور للثوار فى ميدان التحرير - الاف المتظاهرين فى ميدان التحرير - الاحتفال بالثورة
» قصيدة عمر قطامش هدىء أعضاءك يا فلو - قصيدة عمروقطامش للمجلس العسكري والفلول
» قصيدة أعجبتني جدًّا في مدح الرسول صلَّى الله عليه وسلم, قصيدة رائعة
» كيف أصبحنا بشرًا - مولد الإنسانية