د هاني أبوالفتوح
عضو مجتهد
العمل/الترفيه : طبيب بشري - شاعر سياسي وديني
رقم العضوية : 1114
تاريخ التسجيل : 06/03/2011
عدد المساهمات : 116
 |  موضوع: قصيدة : 3 - 8 - 2011 - مشهد تاني !  الخميس 4 أغسطس 2011 - 16:18 | |
|
3 /8 /2011 - مَشْهَدْ تَانيِ !
سجل يا تاريخ يوم للذكرى
وخُدْ لك فِكرة
ولا يوم هأنساك ولا تنساني
والأيام في الذكرى قليلة
عمرها مابترجع تاني
سجل يا تاريخ قوم ويايا
وقول لزمانك و يا زماني
وكل الأزمان إللي هتيجي
كتير من بَعْدِي
تعالوا وشوفوا تآمنوا إيماني
3 أغسطس 2011
أتحدى لو هنشوف زيه
ماإحنا في مصر أم الدنيا
مين في العالم يتحداني ؟
.........................
بصوا وشوفوا معايا لمشهد
بس المشهد مشهد تاني
مشهد لِدَبايح مدبوحة
قوموا وسَمُوا دِبِيحة إنساني
هتشوفوا المقتول و بيقتل
والمجني عليه .. ويا الجاني
وصورة مرسومة وإعلان بيقول
هنشوف حفلة وهنشوف لَمَّة
وهنشوف زَفْة . وأهو خير جاني
..............................
كل الدنيا هتشوف ويانا وتتفرج
إيدوا الأضواء .. جِيبُوا المُخْرِج
مخرج مسرح , على تليفزيون
ويساعد مُخْرِجْ إعلاني
كل القنوات يالا هتنقل
وإللي ملوش أوي فى الأفلام
هيشوف فيلمنا ولا في الأحلام
ولا أغنية ولا أُمْنِية و أغلي أماني
..........................
أحداث .. منقولة لكل الناس
إللي بيفرح و إللي بْيِشْمَتْ
وإللي بْيِزْعَلْ وإللي يْزَغْرَطْ
وإللي يقول أنا شُفْتُه اليوم
الحمد الله .. ربي عطاني
..........................
أم الدنيا بعد الثورة فيها مُحاكمة
لنظام سابق .. ووزير سابق
وسبعة يساعدوه
لابس أزرق ولابسين أبيض
ورئيس سابق جاي في سريره
وولاده جنبه وبيساندوه
والكل هناك في قفص أسود
حديد في حديد الشكل جديد
تلاته في تمانية .. في يومين شَدُّوه
والقاعة مليانة وزحمة في الهم تْتُوه
............................
ناس ياما هناك بالروب الأسود
إللي يْرَتِبْ .. وإللي يجهز
وإللي بيكتبْ في طلب عَدُوه
والكل هَمُه ... إزاي هيبان
جوة البرواز .. تحت العنوان
وإللي زَمايْلُه وقفوا يساندوه
وإللي كْبِيرُه يْعَلِي في صوته
جاي المحكمة علشان يفرح
وللا يْسََقَّف .. وإن زَوْدْها
تلقي الحراس يجروا يهَدُّوه
والشاشة بتعرض للملايين
قُدام الشاشة و بيشاهدوه
ولا كاس عالم
مصر بتلعب ولوحديها
حيوا اللعيبة إللى بتلعب
حيوا الكابتن حيوا إللي جابوه
حيوا الحراس إللي بتُحرسْ
جوا المشهد
وإللي بيُحرُس بره المشهد
وإللي إخترعوه
الحاجب نادى وقال ... محكمة
والمتهمين ..
واقفين م الرعب وم الخيبة
قاضي بيظهر جوة المشهد .. مليان هِيبه
العدل يبان جوه عيونه , ومصر في لونُه
أول ما دخل .. الكل وقف وبيحيوه
.............................
المشهد كان في الأول
بدايات ثورة إبتدا في ميدان
إتحول بقى ثورة حقيقي
في بلد والعة قايدة حريقة
وفي كل مكان
والمشهد بقى دم لشهدا
جاي بالأحزان
المشهد إنتهى بتنحي لرئيس سابق
بقى في النسيان
ونظام فاسد هَمُه التوريث
آخر حُكْمُه ذُلْ و طغيان
إنتهي في 11 فبراير
قلنا إرتحنا والحق أهو بان
بس الظاهر
الثورة كان علشان تكمل
ويهدا البركان
كان لازم نستنى شهور
ومصر الغالية عايشه في حرمان
لا فيها إستقرار .. ولا فيها نهار
من قلب مظاهرة لمظاهرة
ومن جمعة لجمعة تشوف ألوان
وَقَفْ الإنتاج .. ولا نِتْقَدِمْ
عايشين في طوفان
........................
ووصلنا لمشهدنا التاني
جايز من بعده مصر هتهدا
وهتوصل بينا لبر أمان
المشهد شُفناه في الصورة
وكان على عينك قوم إتفرجْ
لا تقول كان فيلم ولا تمثيل
وللا القاضي كان بيهرجْ
المشهد راجل في التمانين
جاي يتحاكم ومَلُوشْ مَخْرَجْ
وولاده الاتنين واقفين
أنفاس محبوسة ولا بْتُخْرُجْ
و وزير كان بيهز القاعة
وسبعة مساعدين وياه قاعدين
جوه الكادر جابوا المُخْرِجْ
.......................
سبحان الله على دا مشهد
وإللي يشُوفُه وإللي بيشهدْ
الناس مقسومة مابين شَامْتِينْ
بين إللي يطالبوا بحق الدم
وحق الدين
وناس تانية تقول إرحموا مِسْكين
وكبير في السن م الذل حزين
المشهد دا هيحل الأزمة يا مصريين
وهتفرح مصر
وترجع شايلة أعلام النصر ؟
وللا المشهد هيودينا لمشهد تاني
قُولِّلي يا مَشْهَد هتاخدنا لفين ؟
ربنا يستر ... خليكوا شاهدين
ربنا يستر على مصر ... آمين
شعر د هاني أبوالفتوح
الكويت – الأربعاء 3 أغسطس 2011
| |
|
