أنا مش معاهم أنا معاكي
عارفين ازاي وليه ؟
المجلس العسكرى وحش وخاين
والداخليه مجرمين
وشرف فاشل
و الجنزورى وحش وفلول
والاخوان متواطئين مع المجلس
والسلفيين ملهمش فى السياسه
السؤال دلوقتى لما ييجى رئيس منتخب باذن الله الشعب هيحترمه و يتعاون معاه ؟!
وده طبعاً من رابع المستحيلات في ظل تلك الفوضى في الانتقاء والتعالي على إرادة الغالبيه من الشعب من جانب قلة أو فئات لا تمثل إلا نفسها تدعي انها تمثل الشعب وتخاف عليه ....
اليس شرف هو من حُمل على الاعناق فى ميدان التحرير و بعدها بشهرين تم لعنه ؟!
الم يخرج الشعب عن بكرة ابيه يهتف الجبش و الشعب ايد واحده ثم اصبح البعض يلعنه و يتهمه بالفساد ؟!
الم ياتى الاخوان و السلفيين للمجلس من خلال انتخابات رائعه و اصبحوا يلعنوا يوميا على الفضائيات ؟!
طيب منين نضمن ان الرئيس القادم هيحترم !!!!
للاسف مظاهر الفوضى تنفر المستثمر المصرى قبل الاجنبى من عمل اى شئ و الاقتصاد بينهار
اما موضوع حكم العسكر إحنا عايشين في حكم عسكري من 60 سنة الرؤساء قادة جيش و المحافظين لواءات و المستشارين ظباط على المعاش
مفيش حد يقدر يسقط الجيش لأنه لا يجب علينا ان نترك متظاهرين المطالب الفئوية يقطعون الطرق و يحتجزون السائحين ويحرقون ويخربون بدون أن يتدخل احد لردعهم
ولتعلموا ان المجلس العسكرى ليس خائن ولا عميل ولا مجلس عار ولكنه لم يمارس العمل السياسى من قبل تذكروا ايام مجلس الوزراء وبمجرد ان وقف الجيش فى مواجهة مع الشباب بدأت ايادى الادانة الغربية ترتفع على اساس ان التدخل الغربى وارد واتهامه باستخدام القوة المفرطة وتذكروا جيد ما حدث للسودان فقد بدء التقسيم بعد ان طلبت المحكمة الجنائية الدولية تسليم البشير والسؤال هل يقبل المصريين طلب الغرب تسليم المجلس العسكرى الى الجنائية الدولية ليكون بداية تقسيم مصر ؟!
انكم ستندمون اشد الندم اذا ما مست مصر بسوء
بكل أسف وحزن فرضانا بهذا الوضع وسكوتنا عليه إنما نحن بذلك نتامر على انفسنا
نطلب الامن ونهاجم وزارة الداخليه، ثم نطالب بالاستقرار و نحن فى الشارع نكذب اعيننا ونصدق الشائعات نطالب بتحقيقات فى القضايا مع تحديد المتهمين مسبقا ننافق الثوار ,تماما كما كنا ننافق مبارك نطالب ببناء الاقتصاد وندعو للعصيان المدنى احنا نعمل عصيان مدنى لو بلدنا تستحمل عصيان مدنى احنا بعد الأحداث اللى فاتت فى حوالى 300 ألف قعدوا فى بيوتهم بسبب كرة القدم لأن ده شغلهم، يا أخي بدل متفكر فى عصيان مدنى وتوقف حال ناس شغاله فكر فى نفسك وشوف انت عملت ايه غير الزعيق ويسقط العسكر
كلنا متفقين إننا عايزين حكم مدنى بس كل واحد يفكر فى نفسة لمدة عشر دقايق ويشوف هو عمل ايه مفيد لحد دلوقتى غير انه بيعترض على كل حاجة
مجلس شعب معترضين عليه انتخابات رئاسية قبل متحصل معترضين عليها القوات المسلحة تفضل لغاية الانتخابات برده معترضين
نسلم السلطة لمجلس الشعب هيعترضوا ويقولو الاخوان سيطروا على البلد هما والسلفيين ... نختار رئيس سواء دلوقتي ولا بعد شهر ولا بعد سنة برضو هيعترضوا ويقولك رئيس متواطئ وخائن وبيجامل المجلس العسكري ولا مجلس الشعب ولا ولا ولا ولا
يا اخي كفاية زعيق وقولي انت عملت أيه ؟!
علشان كده انا مش معاهم يا مصر
أنا معاكي .. مع اللي بيحبك ويخاف عليكي ويفكر فيكي قبل نفسه وأهله ... ودول معروفين ومعروفين أوي
لا هما عايزين يقطعوا طريق ولا يتعدو على مال عام ولا يناموا في الشارع ولا يشتموا بكل وقاحة وقلة أدب في الكل ولا يضربوا عن العمل علشان يطلبوا شيء شخصي في عز الأزمة اللي انتي بتمري بيها.. ولا اللي بيدعوا انهم بيطالبوا بحقوق الشعب والله يعلم ما في نواياهم .. ولا اللي عايز يخلي الغريب يدخلك ويتحكم في رزق ومصير ولادك.. ولا ولا ولا ولا
انا مع اللي عارف انك لسه خارجة من غرفة انعاش عشتي فيها عقود طويلة من الزمن ومحتاجة اقل شيء فترة نقاهة ولو بسيطة علشان يقدر يطلب منك حاجة لنفسه هو عايزها وعارف انك كريمة وعمرك ما هتبخلي عليه ... أنا مع اللي بيخاف على ابنائك كلهم بكل انتمائاتهم وبكل وبيحترم ارادة الغالبية ولو طلب طلب لنفسه مش بيكون بوقاحة ولا عدم خوف عليكي وعلى مصيرك ... انا مش معاهم انا معاكي
موضوع: أنا مش معاهم أنا معاكي 
السبت 11 فبراير 2012 - 17:06
