كدب في كدب
كل يوم عايشين في حالة
م الكلام والحكاوي والقوالة
اللي جاي يفتح فتوحوا
واللي قال يفديك بروحوا
واللي أقوالة إستحالة
...........................
كله نازل الإنتخاب
اللى جاب كشف الحساب
واللي كان عاصي وتاب
واللي كان في السجن طالع
قلبه مليان حقد والع
يحكي أيام العذاب
واللي خد في حبوب شباب
لأجل يرجع بعد شيبته
يقول ما شاب
........................
اللي يحلف ميت يمين
إنه شايلِكْ جوة قلبه
وحط صورتِك عالجبين
وإن لما الثورة قامت
كان معاها
بس كان مغلوب لأمره
مستكين
واللي كان ماسك الوزارة
غصب عنه وبات حزين
حتى شوفوا أما أقابل ثورجية
لما يدعوا كان يِرُدْ يقول آمين
.......................
واللي طالع م الليمان
جاي عشان يفتح بيبان
لما عاش في جماعته حاضر
بس بعد الثورة ثاير
قلبه مليان بالإيمان
اللي كان في نقابة عايش
يستلم دعم ويوزع
في المحبة والحنان
جاي بخبرة كبيرة جدا
لَمْ فيها ملاك وطاهر
قَعَّدُوا جنب الشيطان
المهم إنه يعدي
فوقنا راكب عالحصان
واللي عامل نفسه عدل
والعدالة بس صورة للميزان
.......................
والمناضل اللى ناضل
بالخطب ويا الكلام
واللي كان في الميدان
بالكتير يضرب سلام
لما نور الثورة بان
حتى شوفوا
صورته فوق دبابة واقف
لما كبر بالأدان
إشربي يا مصر يالا
زيي شارب م الكيعان
وأما أقول شكرا شبعت
هيقولولي إشرب كمان
والحقيقة
كله كدب في كدب لازم
مستخبي و للا بان
الكلام ببلاش يا مصر
يشتريك ويبيع لسان
كله يلعب بالكلام
لأجل يوصل للمكان
شعر د هاني أبوالفتوح
الكويت الخميس 26 إبريل 2012
[center]
موضوع: قصيدة :كدب في كدب 
الخميس 24 مايو 2012 - 0:06
