قصيدة : عاشقك وطن وللا كفن !

عاشْقَكْ وطنْ و لّلا كَفَنْ!
.........................................
عاشقك وطن رغم المحن
ما تقولي بس حكايتك ايه
الحزن لو كان له تمن
بحر الدموع يملى عنيه
ولو يدور بينا الزمن
نرجع نبوس في تراب ايديه
........................
فيه ناس تقول ساكنك شيطان
وأنا عمري أقول عنك ملاك
عاشقك قوي
عشق الحياة لو تِرتوي
دمي فداك
بس انت تِرجع للحياة
ارجع بقى و افرد لنا طوق النجاة
....................
الفجر شقشق
وانت لسه واقف هناك
في المزلقان وعلى الحدود
وفي الميدان قصة خلود
كان الدعا وقت الآدان
وف السجود
ندعي نقول ارجع بقى
امتى تعود
دا انت اللي خطيت المحن
و انت اللي عديت السدود
اسأل ولادك واقرا التاريخ
واقرا الآيات من غير شهود
......................
إن كنت ناسي أفكرك
مكتوب عليك بلد العجايب
والدنيا شايفاك أمها
حتى العدا ... حتى الحبايب
عاشقك و عِشقك فوق جبيني انكتب
والقلب دايب
عاشقك ولو مليان مصايب
بس المصيبة كلها في البعد عنك
وأنا عمري كله انكتب
سني في سنك
...................
كفاياك سكوت
اصرخ بقى لم الولاد
دا في كل حتة حاصدها مووت
القطر حالف يدهسك
وعلى القضيب الدم سال
و صراخ بصوت
............................
اوعاك لا تِسكت عالألم
دا الجرح شاقق قلبنا يا جرحنا
يا حزن ياما بالفرح بِيضُمنا
ولما جيل ثورة طرح شال همنا
بس الهموم من كترها بِتْلِمنا
..................................
شهدوا عليك الناس بحالها و الزمن
انت الحياة وانت الممات انت السكن
بس السكن ازاي يكون
هي الحقيقة زي الخيال زي الجنون !
أنا قلبي كان أبيض حنون
بس البياض وسط العلم بقي ألف لون
بيض في إسود و بدم أحمر اتغسل
شوف ضحكته ... زي العسل
واللي إتظلم
بيقول وطن ... رغم الألم
مجروح وطن ينزف وطن
ملفوف هناك بقماش علم
بدال ما نجري نرفعه نلقاه كفن !!!
مشاعر د. هاني أبوالفتوح
الكويت – الجمعه 18 يناير 2013