قصيدة : كان حلم و تاه

كَانْ حِلْمْ وِ تَاه !!

فاكرين الحلم
اللي حْلِمناه

كان حِلم كِبير

ولا في الأحلام

ولا في
الأساطير

بس الأحلام عندنا بتطير

زي العصافير

ساعات نتغدى بنفس الحلم

ونسأل
إمتى يعيش و بخير

الحلم يا ناس اللي حلِمناه

كان من سنتين

كان عيش حرية معاها حَياة

و عدالة و دين

كان حلم بفرحة بنتمناه

لسنين جايين

كان حلم شيوخ الْمُر عَاشُوه

لكن صابرين

كان حلم بيوت و شباب ثوار

و بنات حلوين

لا يخافوا من
موت ولا ضرب النار

و دخان وأنين

وعشان الحلم ساعتها يعيش

الكل بيجري على الميادين

وفي يوم الجمعة ملاك الموت

واقف بثبات مستني حزين

الثورة الطاهرة تبتدي بمظاهرة

و الفجر بِيِدَّن للثايرين

الشعب يْكَبَّر كُله معاه

الحلم حقيقة واخدنا لفين

الحلم ساعتها كتب له ميلاد

بدماء شهداء و زهور بساتين

الإيد في الإيد كتبوا المواعيد

لجنان رايحين

المسك العنبر هيقول إيه

شاف دم شهيد وَرْد و رياحين

من قلب ميدان الثورة لفوق

طالعين للجنة مع الخالدين

الحلم يِكَبَّرْ الثورة تِطَهَّرْ

في فساد و عناد ظلم الحاكمين

الله يا ولاد على الحلم ساعتها

على
لحظة وِحْدَة بلدنا دَعِتْهَا

.........................

و تْمُر ساعات و شهور و سنين

لا اتغير حال ولا شفنا جمال

ولا شفنا السعد ولا الملايين

والصورة مكسورة

مش نفس الصورة

بدلنا الحلم بحلم حزين

العيب في الحلم ساعتها أكيد

و لا العيب في البني آدمين

أحقاد بتزيد والنار بْتْإِيد

وبتحصد أرواح المساكين

دلوقتي بدأنا نفوق م الحلم

لا لقينا العدل اللي عشقناه

ولا جه بحصانه صلاح الدين

العيش بكوبون وتلاتة في اليوم

وكوبون بنزين

و جنيه بيعُوم و دولار بيقُوم

ضارب اْسْفِين

بِيْغَلِي الدنيا بحالها معاه

وغِيلاَن
واقفين سَانْيِنْ سكاكين

الحلم يا ناس
اللي حلمناه

إزاي هنجيبه في
يوم لو تاه

لو ضاع حلمنا
كده من وسطنا

علشان فيه ناس
مننا قاتلاه

حلمنا كان إيه كان حلم جنون ؟

كان حلم حقيقة
و طوق لنجاة

الحلم
هَيِرْجَعْ لما الإيد هتكون في الإيد

الحلم حقيقة لو
هنحافظ عالمواعيد

لو قلنا استنوا
سنة سنتين

نستنى أكيد

مش نجري نقول
في حلول ميت يوم

ونعيد ونزيد

و نقول للناس
الجنة خلاص

حتى الغلبان
هيبات كسبان

فرحان و سعيد

و يمر بدال الْمِيَّة
اتنين

والْبَلَّة
يزيد وياها الطين

وعشان الكرسي
نعادي في بعض

ونقتل بعض

بلاها سياسة
بلاها أحلام وتجارة بدين

كان حلم و تاه

كلنا ننساه
.... باركوا لآسفين

كان حلم عبيط

أحلام مجانين
.... أحلام مجانين

مشاعر د. هاني
أبوالفتوح

» قصيدة عمر قطامش هدىء أعضاءك يا فلو - قصيدة عمروقطامش للمجلس العسكري والفلول
» قصيدة أعجبتني جدًّا في مدح الرسول صلَّى الله عليه وسلم, قصيدة رائعة
» قصيدة :كدب في كدب
» قصيدة : هو مين ؟
» قصيدة : قط و فار