يا غربة يا بكاية يا غشاشة يا مستهبلة
تغرينا بدرهم قروش ووراها قنطار بهدلة
جيناك نقعد بس سنة وحاجتنا ناقصة نكملها
نبني البيوت في العاصمة نفرش أثاثها نجملها
كرولا حارة نرسلها أصلو النقل صار مشكلة
نكمل الدين بمهل والسمحة جاهزة نحصلها
غير القروش اللي الأهل عبر الشهور ح نرسلها
والباقي يدخل في البنوك ونشوف ديارها نشغلها
ناس فكرت تجني العلم وتبدأ الدراسة تواصلها
أحلام كثيرة وشيقة وأمال كبيرة مدنكلة
لكن حساباتنا الغلط في كل عام بنرحلها
مرت سنين من العمر بنعزها وبنفضلها
والحسبة وصلت طاشرات ويمكن نعيش وندبلها
وتعال نحاسبك يا وهم من غير رقم أو أمثلة
كان للقروش نجري ونحوش لكن تقول بنشاكلها
ما راضية تقعد في الجيوب وتقول حرامي بينشلها
لكن بترقد في الضهور بديون ثقيلة مطولة
ممحوقة ما بتقضي الغرض وأقل حاجة تكملها
كملانة بطحاء وباب شريف وحق وزن ومجاملات مستفحلة
من ضرائب (أبو عاج) المشي وإلزامي (الجاز) نحولها
وأحلامنا ديك صبحت سراب نمشي ونجر ما نحملها
يا ريت يكون هم القروش يا غربة فيك هو المعضلة
لكن تعال شوف الهموم لم افتكرنا نقابلها
زلة ومهانة واحتقار وخلو النفوس متململة
سجناً كبير فيه الكفيل سجان قيوده مكبلة
أشغال شاقة ومؤلمة ودائماً تكون مستعجلة
مرض الضغط والسكري ومرض القلب ووجع الكلى
مصران وقرحة واكتئاب ونفوسنا ما متحملة
وجينا فيكي كيمان لحم تحت الهدوم متندلة
وأكيد ح يكون أكل المعلب وأكل المجمد عاملها
عدم الرياضة والكندشن لابد يكون لهم صلة
وكمان تعال لمعادله ما قدرنا أصلاً نعدلها
سجن العيال جوه الشقق إلا فراق العائلة
جيب العيال بي جيبنا مال وجيوبنا غيرها مميلة
وصغارنا صبحت بالزهج متوحشة ومتجفلة
لا قادرة تدرس بنفس من الدروس المذهلة
تلقى الولد غالبه الكلام والبنت كبيرة مريلة
كل الضغوط جاتهم سوا ما قدرنا حتى نقللها
في كل طرف تلقى القرف تلقى الخيوط متداحلة
أما الفراق أصل الوجع ومشاكله بايته ومقيلة
كل زول مفارق عارفة كيف ما في داعي نفصلها
يا غربة أديناك كثير أدينا خاطرك يسهلها
خلينا نرجع بالفضل نلحق حياتنا نعدلها
أمالنا فيكي بدري اتنسب إلا الرجول متوحلة
وبقيت زي أهل القبور لا البرة عارف يدخلها
ولا الجوة يرجع لورا يحكي الحقيقة يوصلها
لكن خلاص هان الخلاص عدك نزل مهما علا
وإن شاء الله نودعك وتكوني ذكرى نغازلها
يا غربة يا بكاية يا غشاشة يا مستهبلة
موضوع: احساس مرير ومتناقض 
السبت 30 أكتوبر 2010 - 12:58
