قصيدة أنا راجع

أَنا رَاجِعٌ
يارب الخلق سبحانك
بترزقنى … وأنا عاصى
تذكرنى … أقول ناسى
بحق الحق ياربى
ماتسقينى مرار كاسى
أنا عبدك … أنا الانسان
أنا العاصى فى كل زمان
ولما أمشى ورا نفسى
ويركبنى ألف شيطان
أتكبر
ولايمكن أقول غلطان
ولما فى مرة أحتاج لك
بأرجعلك . بتنجدنى
بتاخدنى
أحس بفرحه جوايا
ونور الحق ملآنى ايمان
أروح أبكى على حالى
أبات ندمان
……………….
أنا عبدك … أنا الضايع
لقيت نفسى … بأقول راجع
أنا راجع . أنا راجع . أنا راجع
انا راجع تانى لبابك وكلى ذنوب
شيطانى لما يغلبنى .أقول راح أتوب
وأحس انى راح أندم على المكتوب
يقوم جوايا شيء يصرخ يقول ارجع
لرب كريم .. لرب قلوب
…………………………
ملوك الرحمه بتنادى على هناك
أبواب التوبه مفتوحه بتستناك
تقول إرجع وِأُقوم إبكى على بلواك
أقول راجع . أنا راجع . أنا راجع
……………………….
أقول راجع … وهأغسل ذنبى بدموعى
وهعلن توبتى ياربى . فى قرآنى وفى خشوعى
وهتذكر حساب الآخرة وقت الذله وخضوعى
ومش أنسى عذاب القبر لو يطبق على ضلوعى
عشان مرجعش تانى أندم على عملى
وكل منايا ياربى .. وأمل أملى
بأنى أموت على التوبه وأعيش مستور
ويوم ماآجى هناك عندك أكون مجبور
ويوم الآخره أشوف وجهك
أشوف النور
تمت بحمد الله

د.هانى أبوالفتوح