أجمل أيام حياتنا..الخطوبة..والجواز..والحب كن لها راجل بجد , تكن لك ست بجد
موضوع اسمه حلو
يارب يكون مضمونه حلو كده
بالنسبة للراجل , عايز تعيش سي السيد ؟ عايز تعيش مرتاح ؟ عايز تعيش متحكم ؟ عايز تعيش سعيد وخلاص ؟ ولا عايز تعيش سعيد كما كان يعيش رسول الله صلى الله عليه وسلم؟؟؟
كلنا طبعاً بندور على الراحة و السعادة , بس مافيش حد عمره فكر الست عايزة ايه في الراجل اللي ترتبط بيه ؟؟ عايزة الراجل يتعامل معاها ازاي؟؟ عايزة تحس معاه بإيه؟؟؟ عايزة كل توقع منه يبقى عامل ازاي؟؟ عايزة حبه يبقى شكله ازاي؟؟ عايزة حنانه وحضنه يبقى عامل ازاي؟؟ عايزة رجولته يبقى شكلها ازاي ؟؟
الاسئلة مش هتخلص
الستات عايزة الراجل اللي يحافظ عليها
عايزة الراجل اللي يكون قوي الشخصية في اتخاذ القرارات
عايزة الراجل اللي يعيش ويحتويها ويحبها ويديلها احتياجتها النفسية
عايزة الراجل اللي يقدر عقلها ويعذرها ان غلطت في شئ هي ماتعرفوش
عايزة الراجل قلبه كبير وقوي يستحمل متاعب الحياة
عايزة الراجل يشتغل ويكون مثالي جوه البيت في الحب والحنان والرقة
عايزة الراجل التقيل اللي يعرف يعبرلها بالكلام عن مشاعرة في اوقات مناسبة
مش عايزة راجل يسمعها 24 ساعة كلام حب لانها مش عايزة تمل منه
عايزة تحس بالرومانسية وفي نفس الوقت مش عايزة تفقد احساس ان جوزها قوي
عايزة اللي يعاملها كويس , واللي يكبرها قدام الناس خصوصاً اهلها واهله
عايزة الراجل اللي يعيشها ومايحسسهاش انها ناقصها حاجة حتى لو كانوا فقراء
عايزة راجل محترم ألفاظه محترمة ومايغلطش فيها ولا ثانية في عمره
عايزة الإنسان اللي يتعامل معاها وقت الغضب بحكمة
عايزة جوزها طول الوقت بطريقة معينة , عايزاه متجدد غير روتيني
عايزة الراجل اللي يديلها الأوامر بس بطريقة فيها حب , اقولها اعملي حاجة بطريقة جميلة تحس انها ملكة في بيتها والشئ اللي بتعمله ده حاجة غالية اوي
عايزة الراجل الحنين اللي يدلع ويطبطب ويفهم ويحتوي
عايزة الراجل اللي يقدر حالها ايه دلوقتي , تعبانة من شغل البيت يبقى ما اتعبهاش زيادة
عايزة الراجل الحساس اللي يقتنص الفرصة ويخلص أي مشكلة في كلمة والكلام مابينهم يحلو أكثر ويتمسكوا ببعض بعد كل مشكلة جديدة
وفوق كل ده عايزة انسان ملتزم متدين يعامل ربنا فيها , يكون أب مثالي , اب بجد , اب يتحمل المسؤلية , وقت الجد يكون جد وباقي الاوقات اب معلم مربي اب حنين
اب يكبر صورة الأم في عيون الأولاد , أب جميل في طباعه واخلاقه ومشاعره
اب بيقلد أخلاق الرسول صلى الله عليه وسلم
طيب ادينا عرفنا جزء كبير من اللي الست عايزاه في الراجل وطبعاً ده كلام قليل جداً , لان الإنسان بطبعه طماع , بس لما يطمع في حلاله من حقه
طيب أعمل ايه عشان اعرف هي عايزة ايه كمان؟؟؟؟؟
المفروض من البداية تتفقوا وتحطوا بعض النقط على الحروف
منها
اللي عايز حاجة من التاني يقولها للتاني , سواء في العلاقة الزوجية تكون بشكل معين
سواء في عيب فيا او عيب فيها نقول لبعض ونعالج بينا وبين بعض
وأهم شئ
المشاكل تتحل في نفس اليوم
المشاكل وبإذن الله مايكونش في مشاكل , مايتدخل فيها حد ولا اهلها ولا أهلي
لاننا اكيد فاهمين الدنيا , واذا كانت مشكلة عويصة ناخد راي الناس على انها مشكلة حد تاني , عشان أحافظ على صورتي قدام الناس وقدام اهلها زي ما انا انسان كويس , واحافظ على صورتها قدام الناس وقدام أهلي انها انسانة أجمل من كدة مافيش
مهم جداً اننا نصارح بعض عايزين ايه؟؟
الطباع بتتغير , اللي بيحب اكله ممكن بكره مايحبهاش , واللي مش بياكل أكله ممكن بكره يأكلها , واللي مش متعود على حاجة ممكن يتعود عليها , في سبيل ان الطرفين يكونوا بيرضوا بعض , ايه ده الجمال ده , دي الست لو عرفت ثوابها ايه عند ربنا لما تطيع زوجها لما تدلع زوجها ياه , وكمان ثوابه لما يقلها كلمة حلوة وثوابه لما يحضن حضن او يبوس بوسة
لو يعرف الأزواج ان العلاقة الزوجية اكبر من مجرد جنس , الأحضان والبوس والكلام الحلو
تخيلوا كل ده في ميزان حسناتكم , الله الله
وربنا قال
"ان الحسنات يذهبن السيئات"
أن ناسا من أصحاب النبي صلى الله عليه وسلم قالوا للنبي صلى الله عليه وسلم : يا رسول الله ! ذهب أهل الدثور بالأجور . يصلون كما نصلي . ويصومون كما نصوم . ويتصدقون بفضول أموالهم . قال : " أو ليس قد جعل الله لكم ما تصدقون ؟ إن بكل تسبيحة صدقة . وكل تكبيرة صدقة . وكل تحميدة صدقة . وكل تهليلة صدقة . وأمر بالمعروف صدقة . ونهي عن منكر صدقة . وفي بضع أحدكم صدقة " . قالوا : يا رسول الله ! أياتي أحدنا شهوته ويكون له فيها أجر ؟ قال : " أرأيتم لو وضعها في حرام أكان عليه فيها وزر ؟ فكذلك إذا وضعها في الحلال كان له أجرا "رواه مسلم :صحيح
يعني كل بوسه وحضن بحسنات والحسنات بتنسف السيئات , شوفوا قد ايه ربنا وضع احساس خاص بالعلاقات الزوجية عشان تستمر أجمل وفي حب مابين الطرفين وفي محبه و رحمة و ود
ده انا على كدة حفضل طول النهار ابوس واحضن في مراتي واقولها في كلام حلو!!؟
خد بالك يا مان , كل شئ بالعقل , والشئ اللي يزيد عن حده بينقلب لضدة
الانسان بطبعه بيمل , اختار كل وقت تقول فيها وتتعامل فيه , امتى تقول وحشتيني ويكون ليها طعم , مش تبقى كلمة عادية , اختار الوقت اللي تقول فيه بحبك , ويبقى ليها طعم , لان الكلام سهل وكثير بس ايه هيجرى بعده , لازم تعرف ايه يتقال وامتى وفين , وتقدر الظروف
ومتنساش ان الإنسان عايش عشان يطيع ربنا ويعمر الأرض ويشتغل , ويربي الأولاد ويتمتع مع زوجته , كل دي لو الناس تعرف من المتع الجميلة , كل تعب له احساسه , الفاضي اللي مش بيعمل حاجة مش سعيد
لان السعادة في العطاء وليست في الأخذ
السعادة اني اعمل حاجة مش اني اخذ حاجة وعلى قد ما الانسان بيدي على قد ما ربنا بيكرمه ومش أي كرم , دة كرم بزيادة , رزاق كريم عاطي الله أكبر
وكذلك الكلام للستات , الانسان لو فضل يقول لمراته 24 ساعة بموت فيكي حتزهق منه , لكن الاوقات المناسبة بتخللي الكلمة ليها طعم واحساس وتأثير , والكلمة الحلوة بتلين الحجر
صلى الله عليه وسلم , كان هين لين خلوق مهذب , صلى الله عليه وسلم
نيجي بقى للراجل عايز الست تعامله ازاي؟؟؟
على طول هندخل في الموضوع عشان مافيش وقت نضيعه في عمرنا
دي نصيحة من دكتور متخصص في العلاقات الزوجية
كل ست وبنت مقبلة على الجواز تركز في الكلمتين دوول
عامليه كأبن , احترميه كأب , حبيه كعيشقة , صاحبيه كصديق
عامليه كأبن : الراجل محتاج الي انه يشوف في مراته زي أمه , عايز اللي تدلعه , واللي تحضنه وتقوله كلام حلو , واللي تحس بيه وتعيشه اجمل حياه كانه ابن وحيد لأم حنونة , شوفي بقى , انتي وشطارتك وكله في ميزان حسناتك يابختك بإذن الله
احترميه كأب: شوفي انتي بقى كنتي بتحترمي ابوكي ازاي؟؟ عامليه بالشكل ده في جزء من العلاقة مابينكم , ابوكي يعني بتطيعيه وبتسمعي كلامه , ومهما كنتي كبيرة ومركزك في الحياة مديرة وزيرة أي منصب , او مهما كنتي , اذا رجع من الشغل تعبان , ولقاكي مستنياه بمياة وملح وبتدعكيله رجليه , تخيلي هيعمل ايه؟؟ حيوطي يبوس رأسك ويحضنك , طول ما كنتي متواضعه مع ابوكي , هو بيحبك وبتنولي رضا ربنا كمان يا ستي
وتكبريه في عيون اولاده , ودايماً تقوللهم على ايجابياته , تبعدي دايماً عن أي سلبية ممكن تهز صورة الأب في عيون اولاده عشان خدي بالك هو قدوة في عيونهم , فأنتي لازم تحافظي على الصورة الجميلة دي , وزي ما بتحافظي عليها بإذن الله جوزك هيكبرك في عيون اولادكم
ماتتكبريش , تواضعي لزوجك , احترمي جوزك , عامليه برقه ,
والآن
كوني له عشيقه في حبك له: العشيقة بتموت في التراب اللي بيمشي عليه عشيقها , بس الفرق ان أنتي بتعملي كل دة برضا ربنا وربنا راضي عن اللي انتي بتعمليه , عامليه برقة وحنان ودلعيه , وشوفي طلباته , اسمعي كلامه , خليكي النسمة الحلوة مهما كانت الحياة صعبة عليه , الست تقدر ترفع جوزها عالي , تخيلي راجل راجع يائس من حياته ومشاكل و و و ويلاقي كل اللي نفسه فيه في البيت ويلاقي اللي تشجعه على الاستمرار وانه يعدي الازمات , تخيلي طعم الحياه هيبقى عامل ازاي
ولما يقولك: انا مش عارف من غيرك كنت هقدر اعيش ازاي , شوفي الكلمة دي تسوى عندك ايه واحساسها ايه؟؟؟
واخيراً
صاحبيه كصديق : الصديق هو اللي بيحتوي صديقه , هو اللي بيقف معاه وقت الشدة , الصديق هو اللي بيسمع , الصديق هو اللي بيساعد على اتخاذ القرار الصحيح , ومش معنى اني بأخد راي مراتي في بعض الأمور اني ضعيف الشخصية
لأ , دة حتى يا سيدي لو انت بتشاركها في حياتك , وبتحسسها ان ليها قيمة في حياتك , دي عندها بالدنيا كلها
اسئليه : نفسك في ايه؟؟ عايزني اعملك ايه؟؟ عايزني احبك ازاي؟؟ عايزني ارضيك ازاي؟؟ عايزني اقولك ايه؟؟ عايزني اعملك ازاي؟؟ ايه اللي مش عاجبك فيا وانا اغيره ؟؟ انت حبيبي وكل حياتي وعايزة ارضيك وارضي ربنا برضاك عليا مستعدة اعمل اللي انت نفسك فيه؟؟
بإذن الله مش حيكون في حياتكم مشاكل , وللعلم عدم المصارحة والاهتمام بالتفاصيل دي بيسبب الأنفصال والطلاق المبكر
الجواز دة مش تأبيده ؟؟ لأ دة جواز مدى العمر , بتجوز عشان مراتي دي تبقى مراتي في الدنيا ومراتي في الجنة
وطول ما في طاعة بتقربكم من ربنا مع بعض سوا , ومحافظين على الصلاة والصيام وطاعة ربنا والاذكار وقراءة القرآن , حياتكم هتبقى جنة بإذن الله , وحتى اذا كانت المشاكل معاكم وصعبة , انتم متأكدين ان ربنا هو الرزاق هو اللي الرحيم , متشيلوش همكم في الدنيا , واكيد عارفين الدعاء اللي بيقول : اللهم لا تجعل الدنيا اكبر همنا ولا تجعل مصيبتنا في ديننا
وربنا يوفقك كل اثنين وكل زوجين وكل مقدمين على الزواج , المعلومات دي خلاصة خبرة دكاترة واساتذة , اهل دين كمان , في صورة يارب تكون بسيطة ومفيدة
هذا الموضوع تم بفضل الله وحده وبدون توفيق رب العالمين ما تم هذا الموضوع
وجزاكم الله خيرا , وانشروا الموضوع فوراً , ونسئلكم الدعاء لكل مسلم بظهر الغيب
موضوع: كن لها راجل بجد , تكن لك ست بجد 
الإثنين 24 مايو 2010 - 8:55
